Os días 13, 14 e 15 de xuño de 2022, o Palau de lles Arts, da Cidade das Artes e das Ciencias, en Valencia, acollerá o 33 Congreso Internacional do CIRIEC (Centro Internacional de Investigación e Información sobre a Economía Pública, Social e Cooperativa). O encontro celébrase co lema “Nuevas dinámicas mundiales en la era post- Covid: desafíos para la economía pública, social y cooperativa”, e diríxese a directivos de empresas públicas e privadas a nivel global, representantes do mundo económico e social, dirixentes cooperativos e da economía social, sindicalistas, políticos, profesionais e científicos.
A conferencia inaugural correrá a cargo do Premio Nobel de Economía Paul Krugman, e a de clausura será pronunciada por Mariana Mazzucato, economista referente na análise do papel dos gobernos como motor de innovación. Ademais, durante os tres días de foro, intervirán en 6 sesións plenarias e 8 talleres máis de 50 investigadores, directivos de empresas públicas e da economía social e responsables do sector público, debatendo temas de tanto interese como a vivenda e o desenvolvemento urbano, a gobernanza, os participados entre a economía pública e a economía social, a transición ecolóxica xusta, os investimentos públicos, a cobertura de servizos esenciais como a enerxía, o transporte ou a auga, a innovación e os obxectivos de desenvolvemento sostible. En paralelo, desenvolveranse 16 sesións dedicadas ao cooperativismo, a economía social e a economía pública, onde se debaterán ao redor de 80 comunicacións.
O CIRIEC convida á comunidade internacional ao Congreso de Valencia, un dos principais eventos do ano ao redor da economía pública, o cooperativismo e a economía social. O programa completo, así como as opcións de inscrición e aloxamento atópanse xa dispoñibles na Web oficial do Congreso.
