A Conferencia Europea de Economía Social: Persoas, Planeta, Acción, reunirá en Donostia, os próximos días 13 e 14 de novembro a gobernos, institucións europeas, a OCDE, a OIT, CIRIEC e líderes empresariais da Economía Social. Este encontro, organizado polo Ministerio de Traballo e Economía Social no marco da Presidencia Española do Consello da Unión Europea, ten como obxectivo poñer en valor e visibilizar o peso socioeconómico deste modelo empresarial en todo o mundo e especialmente en España, país referente internacional en Economía Social.
O programa do evento recolle un acto inaugural de alto nivel político no Palacio de Congresos Kursaal de Donostia -Capital Española da Economía Social 2023- coa sesión plenaria ‘Plan de Acción Europeo e Resolución de Nacións Unidas: ferramentas para facer avanzar a Economía Social’. Estará moderada polo Comisionado especial para a Economía Social, Víctor Meseguer, e nela intervirán personalidades como o Comisario Europeo de Emprego e Dereitos Sociais, Nicolas Schmit; a presidenta de EGES e da Confederación de Cooperativas de Euskadi-KONFEKOOP, Rosa Lavín e a subdirectora xeral de Emprego e Protección Social (OIT), Mia Seppo, entre outras personalidades.
De forma simultánea, terán lugar cinco talleres que tratarán a economía social desde diferentes perspectivas: a transformación para o futuro da economía social; a transición verde e dixital; a innovación, financiamento e o acceso aos mercados; a mocidade; e a visibilidade e comunicación.
Na mesma xornada realizaranse visitas a diferentes empresas e entidades de economía social vasca, como o Basque Culinary Center (BCC) ou GUREAK – modelo empresarial de inclusión referente en Europa, e celebraranse os Premios DENON ARTEAN, do cooperativismo vasco, organizados polo Consello Superior de Cooperativas de Euskadi, que se outorgan cada dous anos recoñecendo o labor de persoas e institucións en favor do modelo de empresa cooperativo. Nesta terceira edición, o recoñecemento do cooperativismo vasco será para a Comisión Europea.
Ao día seguinte, o 14 de novembro, tras as intervencións, entre outros, do presidente de SEE e de CEPES, Juan Antonio Pedreño, xunto co secretario de Estado de Emprego, Joaquín Perez Rey, o Cume finalizará coa ‘Declaración de San Sebastián’, que será presentada no Acto de Clausura, e que contará coa participación da vicepresidenta segunda do Goberno de España e ministra de Traballo e Economía Social, Yolanda Diaz.
Nesta segunda xornada celebrarase tamén a segunda edición dos ‘Social Academy Awards’, premios que se conceden con carácter bienal por Social Economy Europe para recoñecer experiencias empresariais innovadoras a nivel tecnolóxico, social e ambiental.
Podes coñecer os detalles deste encontro na Web da Conferencia Europea de Economía Social 2023 – San Sebastián
