O Real Decreto 238/2026, publicado o pasado 31 de marzo, que regula a facturación electrónica obrigatoria entre empresas e profesionais, introduce un cambio de calado que tamén impactará directamente en asociacións e fundacións. Aínda que a norma non menciona expresamente ao terceiro sector, si afecta a todas aquelas entidades que desenvolven actividade económica, unha realidade cada vez máis habitual en organizacións sociais.
Este novo marco obriga a emitir, recibir e xestionar facturas electrónicas a través de plataformas específicas —privadas, ou a solución pública que creará a Axencia Tributaria— e a informar en prazos moi reducidos sobre o seu estado (aceptación, rexeitamento ou pago). Na práctica, a factura deixa de ser un simple documento contable para converterse nun proceso dixital completo e monitorizado.
O impacto é especialmente relevante para o sector non lucrativo pola súa estrutura e forma de traballar. Moitas entidades contan con equipos reducidos, sistemas administrativos pouco dixitalizados e unha actividade mixta na que conviven actividades económicas (nas que emiten facturas e reciben facturas) con outras que non o son (xeralmente financiadas por doazóns, cotas ou subvencións). Isto esixirá unha maior separación e control destas operacións, así como unha reorganización interna xa que todas as actividades veranse afectadas de cheo.
O real decreto introduce novas esixencias operativas: xestión de estados de facturas (aceptada, rexeitada, paga), comunicación de pagos en prazos curtos e maior coordinación entre áreas como administración, contabilidade e tesourería. Todo iso supón un aumento da carga administrativa, unha coordinación clara e regular e a necesidade de implantar ferramentas tecnolóxicas adecuadas.
Cun calendario de aplicación progresivo —como mínimo de 24 meses para a maioría de entidades—, o terceiro sector dispón dunha marxe para adaptarse. Con todo, o cambio de fondo xa é claro: pasar de xestionar facturas a xestionar procesos dixitais completos, con maior rastrexabilidade, control e esixencia na xestión.
En Algalia, levamos anos acompañando a asociacións e fundacións na mellora da súa xestión económica e administrativa, e este cambio normativo reforza algo que xa estamos a realizar con moitas entidades: a necesidade de ordenar procesos, dixitalizar a xestión e anticiparse.
A boa noticia é que non se trata só de cumprir cunha obrigación legal. Ben abordado, este proceso pode axudar ás organizacións para gañar control, reducir erros e tomar mellores decisións sobre a súa actividade económica.
Neste contexto, o acompañamento é clave. Analizar que parte da actividade está suxeita a facturación, elixir a ferramenta adecuada e adaptar os procesos internos marcará a diferenza entre unha adaptación forzada ou unha oportunidade de mellora.
Desde Algalia queremos trasladar unha mensaxe de tranquilidade: aínda hai marxe para adaptarse e o desenvolvemento práctico da norma irá concretándose nos próximos meses. Neste tempo seguiremos ao lado dos nosos clientes para que a adaptación se faga en prazo, con sentido, de forma ordenada e axustada á realidade de cada organización.