Algalia, en colaboración con Fundación EDE, tivo o privilexio de acompañar o proxecto empresarial cooperativo de Raquel, Esther e Óscar: ALTAVOZ S. COOP. MADRILEÑA. Este proceso permitiu á principal ferramenta de consultoría, a propia persoa do consultor, aprender e seguir crecendo.
ALTAVOZ
Raquel, Esther e Óscar son novos, e como moitos outros do noso país, móvense e aproveitan os apoios que atopan á súa disposición para poder forxar un futuro no que teña cabida un proxecto de vida.
Como outros moitos mozos preparados, son persoas formadas en competencias técnicas para o desempeño do seu traballo (formación en dereitos das persoas con discapacidade, tradución de textos a lectura fácil, avaliación da calidade de vida, realización de proxectos de accesibilidade cognitiva …), e ademais aventuráronse a crear e desenvolver unha empresa. Traballar é unha cousa, per ou construír, posuír, unha empresa é outra cousa.
Lanzáronse a cooperativizar o seu traballo e están embarcados na tarefa de dirixir o futuro da súa empresa, xestionar persoal contratado, establecer colaboracións con persoas e institucións, comercializar … Nisto son inexpertos, quen non o é á súa idade e coa súa bagaxe? Pero dispoñen do esencial para progresar: saben recoñecer que necesitan mellorar nalgunhas cousas, piden e aceptan apoios, e aprenden rápido.
ALTAVOZ avanza próximo ao seu terceiro ano de traxectoria, interesante para unha iniciativa de emprendemento empresarial, insuficiente para falar de consolidación do proxecto. Os seus servizos vanse perfilando, incorporando innovacións que os fai únicos. Son bos, os mellores, no seu, e o cliente percibe o valor que lles achega os seus servizos. A produtividade vai en aumento.
A súa estrutura vaise asentando e vanse consolidando relacións e unha cultura específica. A primeira cooperativa de persoas con discapacidade intelectual en España, avanza.
ALTAVOZ avanza porque Raquel, Esther e Óscar, co apoio da súa socia voluntaria e o compromiso do seu persoal contratado, avanzan. O proxecto empresarial é importante e tensa ás persoas que forman parte del para que dean o mellor delas mesmas, máis aló dos límites autoimpostos ou inoculados por terceiros.
Neste contexto é solicitada a Algalia e Fundación EDE unha intervención de consultoría que axude a “colocar” a todas as persoas e institucións no proxecto, comezando pola cooperativa, os seus traballadores e os colaboradores cos que conta para prestar os seus servizos.
O traballo iniciado en febreiro de 2015 acaba de concluír en xullo de este mesmo ano, e ademais dos entregables acordados, quedan no haber dos participantes intanxibles que contribúen a que a cooperativa e as persoas que forman parte do seu proxecto sexan máis poderosas, teñan máis capacidades para alcanzar os seus obxectivos.
Que aprendemos?
Apropiándonos do enfoque de “comunicación para todos” que os nosos clientes nos reclamaban e que exercitamos neste proxecto, apuntamos algunhas aprendizaxes:
- A comunicación para todos facilita a participación de todos.
- A comunicación para todos facilita a toma de decisións dos participantes.
- Na comunicación para todos é máis difícil facer trampas e enganar á persoa coa que te relacionas.
- Unha empresa chama a uns consultores porque necesita apoio.
- Os consultores comezan a traballar e pasan cousas.
- Os consultores traballan para axudar á empresa, e para axudar han de escoitar o que din as persoas da empresa.
- Os consultores hanse de fixar no que as persoas din e no que as persoas calan cando se fala con elas.
- Os consultores hanse de fixar no que din as persoas e en como se moven e que senten as persoas.
- O que os consultores acordaron ao principio que se ía a facer pode modificarse.
- Os consultores modifican o que se fai para axudar mellor á empresa.
- Dous consultores traballan mellor que un só. Dous consultores poden axudarse, pensar xuntos, estar máis atentos ao que pasa na empresa e escoitar mellor.
- Os consultores saben cousas sobre empresas, pero sobre a propia empresa os que máis saben son os que traballan nela.
- Os consultores non deben crer que as cousas son como as ven. Han de facerse preguntas e preguntar a máis persoas.
- Os consultores han de confiar en que as persoas da empresa saben facer cousas ben e que queren o mellor para a súa empresa.
- As empresas móntanse para que as persoas síntanse ben tendo un traballo e poidan gañar diñeiro para levar a vida que queiran levar.
Moito ánimo e moita sorte.
David Pereiro
Socio Consultor de Algalia Servizos para o Terceiro Sector
