Recentemente Celso Gándara socio e xerente de Algalia S. Coop. Galega foi nomeado como presidente da Unión Galega de Cooperativas de Traballo Asociado, UGACOTA, e como consecuencia de que UGACOTA, é unha das socias da Federación de cooperativas SINERXIA, tamén representará a esta entidade como presidente.
UGACOTA é unha entidade, sen ánimo de lucro, formado por cooperativas de traballo asociado que realizan distintas actividades. Foi constituída coa finalidade de:
- Atender as necesidades das empresas asociadas.
- Representar ao movemento cooperativo de traballo asociado a nivel autonómico.
- Promover nas empresas que agrupa e na sociedade en xeral, os valores propios da cultura solidaria que inspira os principios cooperativos.
SINERXIA, é unha federación de cooperativas formada por:
- UGACOTA Unión Galega de Cooperativas de Traballo Asociado.
- UCETAG Unión de Cooperativas de Ensino de Traballo Asociado de Galicia.
- UGACOMAR Unión de Cooperativas do Mar de Galicia.
- ÁRBORE, Cooperativa de consumo consciente.
Sinerxia agrupa a 176 empresas cooperativas, nas que estan implicadas máis de 3.350 persoas, das cales 1.350 son socias traballadoras, 1.500 son socias usuarias e 500 son asalariadas. No exercicio 2014 a facturación das cooperativas ascendeu a máis de 200 millóns de euros.
Algalia S. Coop. Galega, ten tradición e experiencia na participación en órganos de goberno das estruturas de representación de cooperativismo galego, dende a creación da Unión de Cooperativas Eixo, que posteriormente se fusionou coa actual Unión de Cooperativas UGACOTA.
Dende Algalia S. Coop. Galega, estamos comprometidos co desenvolvemento do cooperativismo en particular e da economía social en xeral e queremos agradecer a confianza depositada tanto na nosa cooperativa como na persoa do noso socio Celso Gándara para a realización das labores de representación do sector do cooperativismo en Galicia.
Sentímonos ilusionados e responsabilizados por poder participar e contribuír ao proceso de fusión das diferentes estruturas que agrupan o cooperativismo en Galicia, proceso que se está a producir nestes momentos e do que agardamos un futuro prometedor para o cooperativismo galego.
David Pereiro Pelaez
Presidente de Algalia S. Coop. Galega