Valencia estreouse este mes como Capital da Economía Social 2024 nun acto celebrado no Concello da cidade mediterránea, onde a vicepresidenta segunda e ministra de Traballo e Economía Social, Yolanda Díaz, reivindicou este modelo empresarial como “un orgullo de país”, xunto á alcaldesa de Valencia, María José Catalá.
A vicepresidenta instou a Valencia a continuar o labor que en anos anteriores fixeron Donostia, Santiago de Compostela, Teruel ou Toledo para consolidar España como referente e vangarda da Economía Social en Europa.
“A economía con valores’’ é o lema que presidirá a primeira capitalidade mediterránea da Economía Social, que ao longo do ano acollerá diferentes asembleas de entidades rexionais e estatais do sector, congresos, presentacións de estudos sobre o impacto da Economía Social, así como un ciclo de cinema cooperativo ou reunións con mulleres líderes da Economía Social, entre outros.
Na web publicarase con detalle toda a programación de eventos.
Un modelo consolidado en Valencia
En Valencia existen preto de 9.400 entidades rexistradas baixo este modelo económico, entre cooperativas en diversos sectores (desde agrícolas ata de vivendas ou electricidade, entre outros), sociedades laborais, centros especiais de emprego de iniciativa social, empresas de inserción, sociedades agrarias de transformación, mutualidades de previsión social, confrarías de pescadores e terceiro sector de acción social.
No seu conxunto xeran máis de 165.000 postos de traballo directos e indirectos na Comunitat Valenciana. A nivel nacional son ao redor de dous millóns de empregos, razón pola que se impulsou desde o Ministerio de Traballo e Economía Social un PERTE da Economía Social e dos Coidados con máis de 1.700 millóns de euros no que están implicados dez ministerios.